بيروت افضل مدينة عالمية للسهر؟

بالامس كان علي ان اتخطى عجقة الناس مشيا على الاقدام في الجميزة كانوا كتار والسياحة بالبلد تمام والدعارة ماشية المهم ايلي ماروني وزير السياحة مبسوط وكانت مذيعة تلفزيون المستقبل مسرورة جدا وهي تنقل خبرا مفاده ان بيروت صنفت افضل مدينة عالمية للسهر يا فرحتنا نحنا وعم نبيع شرف ناسنا يعني بالعربي سياحة جنسية

خلص راحت ايام بيروت كان جدي دايما يخبرني عنا وكيف كان لما ينزل ع بيروت ينزل ع ساحة البرج وكيف كان الناس يسلموا ع بعض وكان في سوق الحسبة قريب من تمثال الشهدا وقهوة القزاز وخبار الناس وكيف كانوا يتجمعوا بالساحة ويركبوا الترمواي يعني قطار صغير ايه رزق الله يقول جدي ويتنهد ويتابع

هلق ما عاد حدا يعرف حدا وصارت بيروت عمارات وشركات وأجانب ما بقى تسمع صبحك بالخير وصرنا نسمع بونجور وتوجور وما بعرف شو

سنة 2000 طلع متحدث باسم البيت الابيض وسألو وقتها عن لبنان شو قلهن:

it's a porno place for porno people

وقتها ما حدا رد عليه الا مريم نور ايه مريم نور كتار من اللبنانيي ما بحبوها بس هي وحدا ردت عليه ولا حزب سياسي ولا مرجعية لبنانية رد عليه بس مريم نور ردت لانو اختصر لبنان الحضارة ولبنان الحرف والارزات وبيروت وطوائفنا كلا بتوصيفه هيدا

بس قولكن معو حق؟ ما بقى فيك تنزل ع بيروت صرت بتستحي بحالك هونيك وما بقى بيروت تساع حدا بيروت يللي كان قلبها يساع الكل بركي السياسة او الناس او الحرب؟ ما بعرف كل يللي بعرفو انو بيروت تغيرت 180 درجة وصار لازم نام بكرا عندي 12 ساعة شغل كرمال اقدر عيش

انشالله ترجع ايام زمان وترجع بيروت ست العواصم وترجع النفوس الطاهرة

تصبحوا على خير